aapne sab ko ek taraf se apne ghazab mein rakkha

aap ne sab ko ek taraf se apne ġhazab meñ rakkhā

ham ne baḌī mushkil se ḳhud ko hadd-e-adab meñ rakkhā

ḳhvāb-jagātī is duniyā meñ yaad rahā kab kis ko

kyā Tapkāyā palkoñ se kyā ḳhushkī-e-lab meñ rakkhā

fayyāzī kā ek anokhā Dhang us ne apnāyā

koh-e-nidā meñ chhup ke sab ko dasht-e-talab meñ rakkhā

gahrā gahrā rang vahī hai tīra-shabī kā ab tak

ham ne agarche ik jugnū bhī ḳhema-e-shab meñ rakkhā

bhiiḌ meñ gum hone kā aksar andesha rahtā hai

dil kī ek uljhan kyoñ us ko vahm-e-'ajab meñ rakkhā

chāñd banāne vaale merī ye ġhutthī suljhā de

chāñd banāyā hai us ko to kyoñ aqrab meñ rakkhā

tum 'shādāb' nire shā'ir ho ḳhud ko manvāne ko

thoḌā hunar bhī yāroñ ne apne mansab meñ rakkhā

aap ne sab ko ek taraf se apne ghazab mein rakkha

hum ne baDi mushkil se KHud ko hadd-e-adab mein rakkha

KHwab-jagati is duniya mein yaad raha kab kis ko

kya Tapkaya palkon se kya KHushki-e-lab mein rakkha

fayyazi ka ek anokha Dhang us ne apnaya

koh-e-nida mein chhup ke sab ko dasht-e-talab mein rakkha

gahra gahra rang wahi hai tira-shabi ka ab tak

hum ne agarche ek jugnu bhi KHema-e-shab mein rakkha

bhiD mein gum hone ka aksar andesha rahta hai

dil ki ek uljhan kyon us ko wahm-e-'ajab mein rakkha

chand banane wale meri ye ghutthi suljha de

chand banaya hai us ko to kyon aqrab mein rakkha

tum 'shadab' nire sha'ir ho KHud ko manwane ko

thoDa hunar bhi yaron ne apne mansab mein rakkha