aap se kis ne kaha hai ki mohabbat kariye

aap se kis ne kahā hai ki mohabbat kariye

aap tājir haiñ mire ġham kī tijārat kariye

be-vuzū ishq kī takmīl hai tauhīn-e-sanam

kar rahe haiñ to salīqe se ibādat kariye

ishq meñ kufr kahā jaatā hai shikve kā amal

is liye soch samajh kar hī shikāyat kariye

sar kī ḳhvāhish hai to ham ahl-e-junūñ de deñge

aap talvār uThāne kī na zahmat kariye

ab kahāñ miltā hai dīvāna koī sahrā meñ

gar muqaddar se vo mil jaa.e to izzat kariye

kaan meñ sīsa-e-ġham ghol ke farmāte haiñ

qissa-e-ishq merī jaan samā.at kariye

dīda-e-nam pe bichhā kar hī musallā dil kā

ashk ban kar mire jazboñ kī imāmat kariye

aap se kis ne kaha hai ki mohabbat kariye

aap tajir hain mere gham ki tijarat kariye

be-wuzu ishq ki takmil hai tauhin-e-sanam

kar rahe hain to saliqe se ibaadat kariye

ishq mein kufr kaha jata hai shikwe ka amal

is liye soch samajh kar hi shikayat kariye

sar ki KHwahish hai to hum ahl-e-junun de denge

aap talwar uThane ki na zahmat kariye

ab kahan milta hai diwana koi sahra mein

gar muqaddar se wo mil jae to izzat kariye

kan mein sisa-e-gham ghol ke farmate hain

qissa-e-ishq meri jaan samaat kariye

dida-e-nam pe bichha kar hi musalla dil ka

ashk ban kar mere jazbon ki imamat kariye