aap tak aa ga.e ham aane ko
kaise samjhā.eñge zamāne ko
chhoḌo ab mujh ko āzmāne ko
bhuul jaao mire fasāne ko
hai adā un kī ruuTh jaane kī
ham sadā ā.eñge manāne ko
roke rukte nahīñ kabhī aañsū
lab taraste haiñ muskurāne ko
ghar meñ chhā.ī huī hai vīrānī
dil nahīñ chāhtā sajāne ko
va.ada karke na aa.e vo lekin
ham ne sach samjhā hai bahāne ko
baat kiije sadā mohabbat se
achchhā samjho na dil dukhāne ko
ho karam kī nazar bhī ai 'sāhir'
kyā faqat ham haiñ āzmāne ko
aap tak aa gae hum aane ko
kaise samjhaenge zamane ko
chhoDo ab mujh ko aazmane ko
bhul jao mere fasane ko
hai ada un ki ruTh jaane ki
hum sada aaenge manane ko
roke rukte nahin kabhi aansu
lab taraste hain muskurane ko
ghar mein chhai hui hai virani
dil nahin chahta sajaane ko
wada karke na aae wo lekin
hum ne sach samjha hai bahane ko
baat kije sada mohabbat se
achchha samjho na dil dukhane ko
ho karam ki nazar bhi ai 'sahir'
kya faqat hum hain aazmane ko
Source:
Taaruf (Pg. 60)
-
Author:
Sahir Lakhnavi
-
- Publisher: Sahir Lakhnavi
- Year of Publication: 2014
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.