aaraish-e-KHayal bhi ho dil-kusha bhi ho

ārā.ish-e-ḳhayāl bhī ho dil-kushā bhī ho

vo dard ab kahāñ jise jī chāhtā bhī ho

ye kyā ki roz ek sā ġham ek sī umiid

is ranj-e-be-ḳhumār kī ab intihā bhī ho

ye kyā ki ek taur se guzre tamām umr

jī chāhtā hai ab koī tere sivā bhī ho

TuuTe kabhī to ḳhvāb-e-shab-o-roz kā tilism

itne hujūm meñ koī chehra nayā bhī ho

dīvāngī-e-shauq ko ye dhun hai in dinoñ

ghar bhī ho aur be-dar-o-dīvār sā bhī ho

juz dil koī makān nahīñ dahr meñ jahāñ

rahzan kā ḳhauf bhī na rahe dar khulā bhī ho

har zarra ek mahmil-e-ibrat hai dasht kā

lekin kise dikhā.ūñ koī dekhtā bhī ho

har shai pukārtī hai pas-e-parda-e-sukūt

lekin kise sunā.ūñ koī ham-navā bhī ho

fursat meñ sun shaguftagi-e-ġhunche kī sadā

ye vo suḳhan nahīñ jo kisī ne kahā bhī ho

baiThā hai ek shaḳhs mire paas der se

koī bhalā sā ho to hameñ dekhtā bhī ho

bazm-e-suḳhan bhī ho suḳhan-e-garm ke liye

tā.ūs boltā ho to jañgal harā bhī ho

aaraish-e-KHayal bhi ho dil-kusha bhi ho

wo dard ab kahan jise ji chahta bhi ho

ye kya ki roz ek sa gham ek si umid

is ranj-e-be-KHumar ki ab intiha bhi ho

ye kya ki ek taur se guzre tamam umr

ji chahta hai ab koi tere siwa bhi ho

TuTe kabhi to KHwab-e-shab-o-roz ka tilism

itne hujum mein koi chehra naya bhi ho

diwangi-e-shauq ko ye dhun hai in dinon

ghar bhi ho aur be-dar-o-diwar sa bhi ho

juz dil koi makan nahin dahr mein jahan

rahzan ka KHauf bhi na rahe dar khula bhi ho

har zarra ek mahmil-e-ibrat hai dasht ka

lekin kise dikhaun koi dekhta bhi ho

har shai pukarti hai pas-e-parda-e-sukut

lekin kise sunaun koi ham-nawa bhi ho

fursat mein sun shaguftagi-e-ghunche ki sada

ye wo suKHan nahin jo kisi ne kaha bhi ho

baiTha hai ek shaKHs mere pas der se

koi bhala sa ho to hamein dekhta bhi ho

bazm-e-suKHan bhi ho suKHan-e-garm ke liye

taus bolta ho to jangal hara bhi ho