aariz jabin zulf-e-moambar mein aag hai

aariz jabīn zulf-e-mo.ambar meñ aag hai

ye husn hai ki husn ke paikar meñ aag hai

us āftāb-rū ko take chashm-e-ishtiyāq

allāh ḳhair aag ke chakkar meñ aag hai

bikhre haiñ ḳhvāb meñ koī bikhrā abhī kahāñ

zinda huuñ maiñ abhī mire shah-par meñ aag hai

pās-e-vafā thā is liye kashtī utaar dī

ma.alūm thā hameñ ki samundar meñ aag hai

hadd-e-nigāh phaile ujāloñ kā ye gumāñ

merī nazar hai aag ki manzar meñ aag hai

dil kī lagī bujhā.e kahāñ jā ke ab junūñ

aañsū haiñ aag bāda-o-sāġhar meñ aag hai

jaltī nigah sulagtā jigar zehn-o-dil dhuāñ

kyā kījiye ki apne muqaddar meñ aag hai

aariz jabin zulf-e-moambar mein aag hai

ye husn hai ki husn ke paikar mein aag hai

us aaftab-ru ko take chashm-e-ishtiyaq

allah KHair aag ke chakkar mein aag hai

bikhre hain KHwab mein koi bikhra abhi kahan

zinda hun main abhi mere shah-par mein aag hai

pas-e-wafa tha is liye kashti utar di

malum tha hamein ki samundar mein aag hai

hadd-e-nigah phaile ujalon ka ye guman

meri nazar hai aag ki manzar mein aag hai

dil ki lagi bujhae kahan ja ke ab junun

aansu hain aag baada-o-saghar mein aag hai

jalti nigah sulagta jigar zehn-o-dil dhuan

kya kijiye ki apne muqaddar mein aag hai