aarzu-e-lab-o-ruKHsar liye phirti hai

ārzū-e-lab-o-ruḳhsār liye phirtī hai

zindagī ḳhud rasan-o-dār liye phirtī hai

'arsa-e-dahr meñ taḳhlīq-e-do-‘ālam ke liye

zehn ko garmī-e-afkār liye phirtī hai

kis ko mā'lūm ki shā'ir kī gadā.ī yaaro

jeb meñ daulat-e-bedār liye phirtī hai

apnī har saañs se hushiyār ki dushman kī tarah

zindagī haath meñ talvār liye phirtī hai

ban ga.ī qulqul-e-mīnā bhī sadā-e-fariyād

bū-e-gul bhī ḳhalish-e-ḳhār liye phirtī hai

maiñ vo yūsuf huuñ ki ab merī zuleḳhā-e-hayāt

dosh par misr kā bāzār liye phirtī hai

pahlū-e-mehr-e-daraḳhshāñ meñ añdherā hai 'sirāj'

tīrgī ‘ālam-e-anvār liye phirtī hai

aarzu-e-lab-o-ruKHsar liye phirti hai

zindagi KHud rasan-o-dar liye phirti hai

'arsa-e-dahr mein taKHliq-e-do-‘alam ke liye

zehn ko garmi-e-afkar liye phirti hai

kis ko ma'lum ki sha'ir ki gadai yaro

jeb mein daulat-e-bedar liye phirti hai

apni har sans se hushiyar ki dushman ki tarah

zindagi hath mein talwar liye phirti hai

ban gai qulqul-e-mina bhi sada-e-fariyaad

bu-e-gul bhi KHalish-e-KHar liye phirti hai

main wo yusuf hun ki ab meri zuleKHa-e-hayat

dosh par misr ka bazar liye phirti hai

pahlu-e-mehr-e-daraKHshan mein andhera hai 'siraj'

tirgi ‘alam-e-anwar liye phirti hai