aarzu paikar-o-asnam se Khaali nikli

aarzū paikar-o-asnām se ḳhālī niklī

maiñ ne hasrat bhī nikālī to ḳhayālī niklī

aaj sūraj bhī diyā haath meñ le kar niklā

kūcha-e-shab se sahar bhī mirī kaalī niklī

jabr-e-taqdīr se Dar jaate to mar hī jaate

jab bhī jiine kī koī raah nikālī niklī

ajnabī shahr meñ ik dasht-e-tamannā le kar

kāsa-e-chashm se bīnā.ī savālī niklī

terī TuuTī huī pāzeb ke ghuñghrū taare

dāman-e-shab se tire kaan kī baalī niklī

aarzu paikar-o-asnam se KHali nikli

main ne hasrat bhi nikali to KHayali nikli

aaj suraj bhi diya hath mein le kar nikla

kucha-e-shab se sahar bhi meri kali nikli

jabr-e-taqdir se Dar jate to mar hi jate

jab bhi jine ki koi rah nikali nikli

ajnabi shahr mein ek dasht-e-tamanna le kar

kasa-e-chashm se binai sawali nikli

teri TuTi hui pazeb ke ghunghru tare

daman-e-shab se tere kan ki baali nikli