aarzu uski adhuri har tamanna KHam hai

aarzū us kī adhūrī har tamanna ḳhaam hai

kis liye pahlū meñ mere ab dil-e-nākām hai

zindagī to uljhanoñ kī rahguzār-e-'ām hai

aadmī ke zehn-o-dil ko ab kahāñ ārām hai

ek jāhil shaḳhs kā sab kī zabāñ par naam hai

māhir-e-fan kā bhalā ab is jagah kyā kaam hai

sub.h guzrī din bhī guzrā raat bhī hai sāmne

do ghaḌī Thahrī huī ab zindagī kī shaam hai

ḳhud hamāre yaar bhī ham ko na pahchāneñ yahāñ

bhiiḌ meñ rahne kā logo bas yahī anjām hai

ḳhvāb na dekhā kareñ rakkheñ haqīqat par nazar

aañkh vāloñ ke liye merā yahī paiġhām hai

tū paḌosī hai mirā ye bhī haqīqat hai magar

hai chhurī terī baġhal meñ aur muñh meñ raam hai

saarī duniyā kī hukūmat le ke ab ham kyā kareñ

apne hāthoñ meñ to logo parcham-e-islām hai

aa.ina sab ko dikhātā hai 'ziyā' is vāste

vā'izoñ meñ rahbaroñ meñ vo bahut badnām hai

aarzu us ki adhuri har tamanna KHam hai

kis liye pahlu mein mere ab dil-e-nakaam hai

zindagi to uljhanon ki rahguzar-e-'am hai

aadmi ke zehn-o-dil ko ab kahan aaram hai

ek jahil shaKHs ka sab ki zaban par nam hai

mahir-e-fan ka bhala ab is jagah kya kaam hai

subh guzri din bhi guzra raat bhi hai samne

do ghaDi Thahri hui ab zindagi ki sham hai

KHud hamare yar bhi hum ko na pahchanen yahan

bhiD mein rahne ka logo bas yahi anjam hai

KHwab na dekha karen rakkhen haqiqat par nazar

aankh walon ke liye mera yahi paigham hai

tu paDosi hai mera ye bhi haqiqat hai magar

hai chhuri teri baghal mein aur munh mein ram hai

sari duniya ki hukumat le ke ab hum kya karen

apne hathon mein to logo parcham-e-islam hai

aaina sab ko dikhata hai 'ziya' is waste

wa'izon mein rahbaron mein wo bahut badnam hai