aashiq hain magar ishq numayan nahin rakhte

āshiq haiñ magar ishq numāyāñ nahīñ rakhte

ham dil kī tarah chaak garebāñ nahīñ rakhte

sar rakhte haiñ sar meñ nahīñ saudā-e-mohabbat

dil rakhte haiñ dil meñ koī armāñ nahīñ rakhte

nafrat hai kuchh aisī unheñ āshufta-saroñ se

apnī bhī vo zulfoñ ko pareshāñ nahīñ rakhte

rakhne ko to rakhte haiñ ḳhabar saare jahāñ kī

ik mere hī dil kī vo ḳhabar haañ nahīñ rakhte

ghar kar ga.iiñ dil meñ vo mohabbat kī nigāheñ

un tīroñ kā zaḳhmī huuñ jo paikāñ nahīñ rakhte

dil de koī tum ko to kis ummīd par ab de

tum dil to kisī kā bhī mirī jaañ nahīñ rakhte

rahtā hai nigahbān mirā un kā tasavvur

vo mujh ko akelā shab-e-hijrāñ nahīñ rakhte

dushman to bahut hazrat-e-nāseh haiñ hamāre

haañ dost koī aap sā nādāñ nahīñ rakhte

dil ho jo pareshān to dam bhar bhī na Thahre

kuchh bāñdh ke to gesu-e-pechāñ nahīñ rakhte

go aur bhī āshiq haiñ zamāne meñ bahut se

'beḳhud' kī tarah ishq ko pinhāñ nahīñ rakhte

aashiq hain magar ishq numayan nahin rakhte

hum dil ki tarah chaak gareban nahin rakhte

sar rakhte hain sar mein nahin sauda-e-mohabbat

dil rakhte hain dil mein koi arman nahin rakhte

nafrat hai kuchh aisi unhen aashufta-saron se

apni bhi wo zulfon ko pareshan nahin rakhte

rakhne ko to rakhte hain KHabar sare jahan ki

ek mere hi dil ki wo KHabar han nahin rakhte

ghar kar gain dil mein wo mohabbat ki nigahen

un tiron ka zaKHmi hun jo paikan nahin rakhte

dil de koi tum ko to kis ummid par ab de

tum dil to kisi ka bhi meri jaan nahin rakhte

rahta hai nigahban mera un ka tasawwur

wo mujh ko akela shab-e-hijran nahin rakhte

dushman to bahut hazrat-e-naseh hain hamare

han dost koi aap sa nadan nahin rakhte

dil ho jo pareshan to dam bhar bhi na Thahre

kuchh bandh ke to gesu-e-pechan nahin rakhte

go aur bhi aashiq hain zamane mein bahut se

'beKHud' ki tarah ishq ko pinhan nahin rakhte