aashiq to bad-nasib hai isMein kalam kya

āshiq to bad-nasīb hai is meñ kalām kyā

rakkhā hai tū ne ye to batā apnā naam kyā

ma.ashūq kī nigāh meñ ulfat kā kaam kyā

badnām kar rahe ho mohabbat kā naam kyā

sau baar aap kah chuke ham se na boliye

ye ho gayā hai aap kā takiya-kalām kyā

roz-e-azal ke mast ko piine se kaam hai

us kī nazar meñ hurmat-e-māh-e-siyām kyā

hūreñ balā.eñ letī haiñ ma.ashūq kī mire

paidā na thā bahisht meñ husn-e-tamām kyā

vo ḳhud pilā.eñ maiñ na piyūñ merī kyā majāl

is meñ savāl-e-sub.h hai kyā zikr-e-shām kyā

nazroñ meñ saare tai hoñ mohabbat ke kārobār

ham tum haiñ sāmne to payāmī kā kaam kyā

guzrī hai apnī umr yūñhī intizār meñ

aa.egā 'shād' un kā koī ab payām kyā

aashiq to bad-nasib hai is mein kalam kya

rakkha hai tu ne ye to bata apna nam kya

mashuq ki nigah mein ulfat ka kaam kya

badnam kar rahe ho mohabbat ka nam kya

sau bar aap kah chuke hum se na boliye

ye ho gaya hai aap ka takiya-kalam kya

roz-e-azal ke mast ko pine se kaam hai

us ki nazar mein hurmat-e-mah-e-siyam kya

huren balaen leti hain mashuq ki mere

paida na tha bahisht mein husn-e-tamam kya

wo KHud pilaen main na piyun meri kya majal

is mein sawal-e-subh hai kya zikr-e-sham kya

nazron mein sare tai hon mohabbat ke karobar

hum tum hain samne to payami ka kaam kya

guzri hai apni umr yunhi intizar mein

aaega 'shad' un ka koi ab payam kya