aashiyan par karam-e-barq-e-tapan hai ab bhi

āshiyāñ par karam-e-barq-e-tapāñ hai ab bhī

dekho gulshan kī fazāoñ meñ dhuāñ hai ab bhī

ham-safīrān-e-chaman tum ko mubārak ho bahār

ham asīroñ ke muqaddar meñ ḳhizāñ hai ab bhī

daur hai sañg-e-havādis kā magar kyā kahiye

dil meñ ik kār-gah-e-shīsha-garāñ hai ab bhī

ab na vo dil hai na vo dil kī tamannā lekin

chashm-e-jānāñ mirī jānib nigarāñ hai ab bhī

ham ne kyuuñ ek tabassum kī tamannā kī thī

aañkh us jurm pe ḳhūnāba-fashāñ hai ab bhī

rahnumā.ī kā ye jaadū koī dekhe 'maikash'

gard-e-rah par hameñ manzil kā gumāñ hai ab bhī

aashiyan par karam-e-barq-e-tapan hai ab bhi

dekho gulshan ki fazaon mein dhuan hai ab bhi

ham-safiran-e-chaman tum ko mubarak ho bahaar

hum asiron ke muqaddar mein KHizan hai ab bhi

daur hai sang-e-hawadis ka magar kya kahiye

dil mein ek kar-gah-e-shisha-garan hai ab bhi

ab na wo dil hai na wo dil ki tamanna lekin

chashm-e-jaanan meri jaanib nigaran hai ab bhi

hum ne kyun ek tabassum ki tamanna ki thi

aankh us jurm pe KHunaba-fashan hai ab bhi

rahnumai ka ye jadu koi dekhe 'maikash'

gard-e-rah par hamein manzil ka guman hai ab bhi