aashna kitna zaban ko be-zabani se kiya

āshnā kitnā zabāñ ko be-zabānī se kiyā

zindagī karne ko kyā kuchh zindagānī se kiyā

mausam-e-gul meñ kiyā malbūs banñe kā amal

be-libāsī kā amal barg-e-ḳhizānī se kiyā

kaun hai vo jis ne banjar ḳhushk ḳhittoñ kā ilaaj

dekhte hī dekhte ik saada paanī se kiyā

sub.h ke jaage masāfat se thake dariyā ne phir

shaam hote hī ta.alluq kam ravānī se kiyā

ye vahī thā kaise pahchānā use muddat ke ba.ad

maiñ ye pal bhar meñ usī kī ik nishānī se kiyā

rog thī 'shāhīñ' zamīñ kī tañgī-e-paiham mujhe

ye mudāvā maiñ ne bas naql-e-makānī se kiyā

aashna kitna zaban ko be-zabani se kiya

zindagi karne ko kya kuchh zindagani se kiya

mausam-e-gul mein kiya malbus banne ka amal

be-libasi ka amal barg-e-KHizani se kiya

kaun hai wo jis ne banjar KHushk KHitton ka ilaj

dekhte hi dekhte ek sada pani se kiya

subh ke jage masafat se thake dariya ne phir

sham hote hi talluq kam rawani se kiya

ye wahi tha kaise pahchana use muddat ke baad

main ye pal bhar mein usi ki ek nishani se kiya

rog thi 'shahin' zamin ki tangi-e-paiham mujhe

ye mudawa main ne bas naql-e-makani se kiya