aasi se KHush nahin hai wali se bhi KHush nahin

'aasī se ḳhush nahīñ hai valī se bhī ḳhush nahīñ

ye kaun shaḳhs hai jo kisī se bhī ḳhush nahīñ

ḳhush thā tire baġhair to jaltā thā jī tirā

āñkhoñ meñ hai namī to namī se bhī ḳhush nahīñ

kal merī kam-nigāhī pe mātam-zada thā tū

ab ye sitam ki dīda-varī se bhī ḳhush nahīñ

kyā mas.ala hai tujh ko batā kuchh to mere yaar

ġham se bhī ḳhush nahīñ tū ḳhushī se bhī ḳhush nahīñ

ham to samajh rahe the ujāle se bair hai

ye hukmrāñ to tīra-shabī se bhī ḳhush nahīñ

'hāmid' kā kyā hai haal mujhe kuchh ḳhabar bhī hai

tere baġhair ab vo parī se bhī ḳhush nahīñ

'asi se KHush nahin hai wali se bhi KHush nahin

ye kaun shaKHs hai jo kisi se bhi KHush nahin

KHush tha tere baghair to jalta tha ji tera

aankhon mein hai nami to nami se bhi KHush nahin

kal meri kam-nigahi pe matam-zada tha tu

ab ye sitam ki dida-wari se bhi KHush nahin

kya masala hai tujh ko bata kuchh to mere yar

gham se bhi KHush nahin tu KHushi se bhi KHush nahin

hum to samajh rahe the ujale se bair hai

ye hukmran to tira-shabi se bhi KHush nahin

'hamid' ka kya hai haal mujhe kuchh KHabar bhi hai

tere baghair ab wo pari se bhi KHush nahin