aata nahin hai ab kisi dam-saz ka KHayal

aatā nahīñ hai ab kisī dam-sāz kā ḳhayāl

dil meñ basā gayā vo is andāz kā ḳhayāl

aksar vo us kī chashm-e-fusūñ-sāz kā ḳhayāl

tā-der phir vo hasrat-e-parvāz kā ḳhayāl

ehsās-e-dard-o-ġham se zyāda hai mo'atabar

us dil-navāz sāhib-e-ejāz kā ḳhayāl

kyā jaane fart-e-shauq meñ kis dam pukār le

ab ham haiñ aur dost kī āvāz kā ḳhayāl

tārīkiyoñ kī samt na jaane diyā kabhī

ḳhurshīd ban gayā nigah-e-nāz kā ḳhayāl

vo ḳhud bulandiyoñ kī hadeñ toḌte nahīñ

un ko hai merī tāqat-e-parvāz kā ḳhayāl

jī chāhtā hai jā.iye phir rāh-e-shauq meñ

aane lagā hai phir kisī hamrāz kā ḳhayāl

tauqīr paa.ī jis ke sabab se 'rabāb' ne

rakkhā nahīñ us apnī tag-o-tāz kā ḳhayāl

aata nahin hai ab kisi dam-saz ka KHayal

dil mein basa gaya wo is andaz ka KHayal

aksar wo us ki chashm-e-fusun-saz ka KHayal

ta-der phir wo hasrat-e-parwaz ka KHayal

ehsas-e-dard-o-gham se zyaada hai mo'atabar

us dil-nawaz sahib-e-ejaz ka KHayal

kya jaane fart-e-shauq mein kis dam pukar le

ab hum hain aur dost ki aawaz ka KHayal

tarikiyon ki samt na jaane diya kabhi

KHurshid ban gaya nigah-e-naz ka KHayal

wo KHud bulandiyon ki haden toDte nahin

un ko hai meri taqat-e-parwaz ka KHayal

ji chahta hai jaiye phir rah-e-shauq mein

aane laga hai phir kisi hamraaz ka KHayal

tauqir pai jis ke sabab se 'rabab' ne

rakkha nahin us apni tag-o-taz ka KHayal