aate hi jawani ke li husn ne angDai

aate hī javānī ke lī husn ne añgḌā.ī

is samt girī bijlī us samt qazā aa.ī

jis samt se guzrā huuñ āvāz yahī aa.ī

dīvāna hai dīvāna saudā.ī hai saudā.ī

bhūle hī se aa jaao mahkī huī rāteñ haiñ

barsāt kā mausam hai Dastī huī tanhā.ī

sachchā.ī ke dīvāne chaḌhte haiñ salīboñ par

sadiyoñ se zamāne meñ ye rasm chalī aa.ī

ālām-o-masā.ib kā chaḌhtā huā dariyā hai

ai josh-e-tavānā.ī ai josh-e-tavānā.ī

ab kaun sune bāteñ bahke hue vaa.iz kī

chalte haiñ 'shafaq' ham to vo kaalī ghaTā aa.ī

aate hi jawani ke li husn ne angDai

is samt giri bijli us samt qaza aai

jis samt se guzra hun aawaz yahi aai

diwana hai diwana saudai hai saudai

bhule hi se aa jao mahki hui raaten hain

barsat ka mausam hai Dasti hui tanhai

sachchai ke diwane chaDhte hain salibon par

sadiyon se zamane mein ye rasm chali aai

aalam-o-masaib ka chaDhta hua dariya hai

ai josh-e-tawanai ai josh-e-tawanai

ab kaun sune baaten bahke hue waiz ki

chalte hain 'shafaq' hum to wo kali ghaTa aai