aati hai dam-ba-dam ye sada jagte raho

aatī hai dam-ba-dam ye sadā jāgte raho

jaise ki jāgtā hai ḳhudā jāgte raho

jiite raho lahū meñ harārat hai jab talak

āñkhoñ meñ jab talak hai ziyā jāgte raho

dariyā-e-zindagī kā nahīñ koī e'tibār

jo so gayā vo Duub gayā jāgte raho

bas aaj hī kī shab hai jise zindagī kaheñ

kal kā nahīñ kisī ko patā jāgte raho

gar so ga.e to aañkh khulegī na hashr tak

ye sar-zamīñ hai ḳhvāb-fazā jāgte raho

ye kyā ki sub.h hote hī behosh ho ga.e

shab zinda-dār ho to sadā jāgte raho

phir aa ga.ī hai raat sitāre liye hue

sūraj chhupā charāg jalā jāgte raho

phir koī qāfila huā gard-e-safar meñ gum

phir aa rahī hai bāñg-e-darā jāgte raho

bādal havā ke dosh pe chhā.e hue to haiñ

shāyad baras paḌe ye ghaTā jāgte raho

vo raat hai ki saa.e bhī aaseb ho ga.e

bujhne lagā galī kā diyā jāgte raho

ḳhūñ-rañg āsmān hai rāteñ Darāonī

har ek samt shor machā jāgte raho

chāroñ taraf chamakne lagī saif-e-be-niyām

taarā girā sahāb kaTā jāgte raho

'shahzād' lamhe lamhe meñ pinhāñ hai zindagī

har ek marhala hai nayā jāgte raho

aati hai dam-ba-dam ye sada jagte raho

jaise ki jagta hai KHuda jagte raho

jite raho lahu mein hararat hai jab talak

aankhon mein jab talak hai ziya jagte raho

dariya-e-zindagi ka nahin koi e'tibar

jo so gaya wo Dub gaya jagte raho

bas aaj hi ki shab hai jise zindagi kahen

kal ka nahin kisi ko pata jagte raho

gar so gae to aankh khulegi na hashr tak

ye sar-zamin hai KHwab-faza jagte raho

ye kya ki subh hote hi behosh ho gae

shab zinda-dar ho to sada jagte raho

phir aa gai hai raat sitare liye hue

suraj chhupa charag jala jagte raho

phir koi qafila hua gard-e-safar mein gum

phir aa rahi hai bang-e-dara jagte raho

baadal hawa ke dosh pe chhae hue to hain

shayad baras paDe ye ghaTa jagte raho

wo raat hai ki sae bhi aaseb ho gae

bujhne laga gali ka diya jagte raho

KHun-rang aasman hai raaten Daraoni

har ek samt shor macha jagte raho

chaaron taraf chamakne lagi saif-e-be-niyam

tara gira sahab kaTa jagte raho

'shahzad' lamhe lamhe mein pinhan hai zindagi

har ek marhala hai naya jagte raho