aatish-e-soz-e-mohabbat ko bujha sakta hun main

ātish-e-soz-e-mohabbat ko bujhā saktā huuñ maiñ

dīda-e-pur-nam se ik dariyā bahā saktā huuñ maiñ

husn-e-be-parvā tirā bas ik ishāra chāhiye

merī hastī kyā hai hastī ko miTā saktā huuñ maiñ

ye to farmā dījiye takmīl-e-ulfat kī qasam

aap ko kyā vāqa.ī apnā banā saktā huuñ maiñ

ishq meñ roz-e-azal se dil hai pāband-e-vafā

bhūlne vaale tujhe kyūñkar bhulā saktā huuñ maiñ

ham-nafas mutlaq bhī tūfān-e-alam kā ġham nahīñ

bahr kī har mauj ko sāhil banā saktā huuñ maiñ

baḳhsh dī haiñ ishq ne is darja mujh ko himmateñ

zaḳhm khā kar dil pe 'qaisar' muskurā saktā huuñ maiñ

aatish-e-soz-e-mohabbat ko bujha sakta hun main

dida-e-pur-nam se ek dariya baha sakta hun main

husn-e-be-parwa tera bas ek ishaara chahiye

meri hasti kya hai hasti ko miTa sakta hun main

ye to farma dijiye takmil-e-ulfat ki qasam

aap ko kya waqai apna bana sakta hun main

ishq mein roz-e-azal se dil hai paband-e-wafa

bhulne wale tujhe kyunkar bhula sakta hun main

ham-nafas mutlaq bhi tufan-e-alam ka gham nahin

bahr ki har mauj ko sahil bana sakta hun main

baKHsh di hain ishq ne is darja mujh ko himmaten

zaKHm kha kar dil pe 'qaisar' muskura sakta hun main