aatish-e-zaKHm se jab sina pighalta tha mera

ātish-e-zaḳhm se jab siina pighaltā thā mirā

muñh se āvāz nahīñ ḳhuun nikaltā thā mirā

surḳh angāre dahakte the mirī āñkhoñ meñ

terī tauhīn pe jab rang badaltā thā mirā

itnī mānūs thī ehsās kī lau dhuup ke saath

jism sūraj ke utar jaane se jaltā thā mirā

kam na thī maut kī raftār se raftār-e-safar

saañs ruk jaate the jab qāfila chaltā thā mirā

ġhair ābād masāfat meñ ġhanīmat thī zamīñ

kārvāñ gard kī ḳhūrāk pe paltā thā mirā

dauḌte dauḌte maidān meñ pyāsoñ ke liye

paañv ke talvoñ se ehsās nikaltā thā mirā

habs andar kī nikaltī to havā ruk jaatī

saañs mushkil se ye māhaul nigaltā thā mirā

vahshatī rāhguzar tai na huī mujh se 'alī'

jism to jism hai saaya bhī dahaltā thā mirā

aatish-e-zaKHm se jab sina pighalta tha mera

munh se aawaz nahin KHun nikalta tha mera

surKH angare dahakte the meri aankhon mein

teri tauhin pe jab rang badalta tha mera

itni manus thi ehsas ki lau dhup ke sath

jism suraj ke utar jaane se jalta tha mera

kam na thi maut ki raftar se raftar-e-safar

sans ruk jate the jab qafila chalta tha mera

ghair aabaad masafat mein ghanimat thi zamin

karwan gard ki KHurak pe palta tha mera

dauDte dauDte maidan mein pyason ke liye

panw ke talwon se ehsas nikalta tha mera

habs andar ki nikalti to hawa ruk jati

sans mushkil se ye mahaul nigalta tha mera

wahshati rahguzar tai na hui mujh se 'ali'

jism to jism hai saya bhi dahalta tha mera