aawaz de ke KHud ko bulana paDa mujhe

āvāz de ke ḳhud ko bulānā paḌā mujhe

apnī madad ko aap hī aanā paḌā mujhe

mujh se tumhāre aks ko kartā thā bad-gumāñ

ā.īna darmiyāñ se haTānā paḌā mujhe

phir is ke ba.ad jur.at-e-girya nahīñ huī

ik ashk ḳhaak se jo uThānā paḌā mujhe

phir yuuñ huā ki jhuuT kī aadat sī ho ga.ī

phir yuuñ huā ki sach ko chhupānā paḌā mujhe

paanī qubūl hī nahīñ kartā thā merī laash

dariyā ko apnā naam batānā paḌā mujhe

mehmān aa gayā thā so khāne kī mez par

jaltā huā charāġh bujhānā paḌā mujhe

dhartī ke zarf kā huā andāza jab 'munīr'

kuchh roz apnā bojh uThānā paḌā mujhe

aawaz de ke KHud ko bulana paDa mujhe

apni madad ko aap hi aana paDa mujhe

mujh se tumhaare aks ko karta tha bad-guman

aaina darmiyan se haTana paDa mujhe

phir is ke baad jurat-e-girya nahin hui

ek ashk KHak se jo uThana paDa mujhe

phir yun hua ki jhuT ki aadat si ho gai

phir yun hua ki sach ko chhupana paDa mujhe

pani qubul hi nahin karta tha meri lash

dariya ko apna nam batana paDa mujhe

mehman aa gaya tha so khane ki mez par

jalta hua charagh bujhana paDa mujhe

dharti ke zarf ka hua andaza jab 'munir'

kuchh roz apna bojh uThana paDa mujhe