aazar bahut lazzat-e-azar bahut hai

āzār bahut lazzat-e-āzār bahut hai

dil dast-e-sitam-gar kā talabgār bahut hai

iqrār kī manzil bhī zarūr aa.egī ik din

is vaqt to bas lazzat-e-inkār bahut hai

yārān-e-safar koī davā DhūñD ke laao

insān mire daur kā bīmār bahut hai

haañ dekhiyo irfān-e-baġhāvat na jhulas jaa.e

manzar mirī duniyā kā sharar-bār bahut hai

ham ghar kī panāhoñ se jo nikle to ye jaanā

hañgāma pas-e-sāya-e-dīvār bahut hai

qātil kī ināyat kā maza aur hai varna

jaañ lene ko ye saañs kī talvār bahut hai

kyā log haiñ ye soch ke baiThe huuñ gharoñ meñ

bas zulm se be-zārī kā iz.hār bahut hai

hālāt-e-zamāna se laraz jaate haiñ 'ajmal'

yuuñ hai ki zamāne se hameñ pyaar bahut hai

aazar bahut lazzat-e-azar bahut hai

dil dast-e-sitam-gar ka talabgar bahut hai

iqrar ki manzil bhi zarur aaegi ek din

is waqt to bas lazzat-e-inkar bahut hai

yaran-e-safar koi dawa DhunD ke lao

insan mere daur ka bimar bahut hai

han dekhiyo irfan-e-baghawat na jhulas jae

manzar meri duniya ka sharar-bar bahut hai

hum ghar ki panahon se jo nikle to ye jaana

hangama pas-e-saya-e-diwar bahut hai

qatil ki inayat ka maza aur hai warna

jaan lene ko ye sans ki talwar bahut hai

kya log hain ye soch ke baiThe hun gharon mein

bas zulm se be-zari ka izhaar bahut hai

haalat-e-zamana se laraz jate hain 'ajmal'

yun hai ki zamane se hamein pyar bahut hai