aazar hi ab koi makanon pe girega

āzār hī ab koī makānoñ pe giregā

lagtā hai ki ye baar bhī shānoñ pe giregā

is baar koī tiir kamānoñ meñ nahīñ hai

is baar magar jism nishānoñ pe giregā

ik chīḳh se gūñjeñgī ka.ī aur bhī sadiyāñ

āvāz kā patthar hai zamānoñ pe giregā

sab dekhte rah jā.eñge ye tīr-ba-kaf log

jab jā ke parinda ye chaTānoñ pe giregā

ik shaḳhs jo ḳhvāboñ meñ bhī saa.e kī tarah hai

kab harf-e-yaqīñ ban ke gumānoñ pe giregā

ham ḳhema-e-ashjār se guzreñge bahar-kaif

ġham sūrat-e-barfāb machānoñ pe giregā

jab tak ki takallum meñ nahīñ tāqat-e-guftār

kyā harf-e-talab koī zabānoñ pe giregā

ḳhvāh auj-e-falak tak hī chalā jaa.e ye sūraj

thak kar isī dhartī ke dahānoñ pe giregā

tum phuul barasne kī 'kafīl' aas to rakhnā

kyā sang sadā ā.īna-ḳhānoñ pe giregā

aazar hi ab koi makanon pe girega

lagta hai ki ye bar bhi shanon pe girega

is bar koi tir kamanon mein nahin hai

is bar magar jism nishanon pe girega

ek chiKH se gunjengi kai aur bhi sadiyan

aawaz ka patthar hai zamanon pe girega

sab dekhte rah jaenge ye tir-ba-kaf log

jab ja ke parinda ye chaTanon pe girega

ek shaKHs jo KHwabon mein bhi sae ki tarah hai

kab harf-e-yaqin ban ke gumanon pe girega

hum KHema-e-ashjar se guzrenge bahar-kaif

gham surat-e-barfab machanon pe girega

jab tak ki takallum mein nahin taqat-e-guftar

kya harf-e-talab koi zabanon pe girega

KHwah auj-e-falak tak hi chala jae ye suraj

thak kar isi dharti ke dahanon pe girega

tum phul barasne ki 'kafil' aas to rakhna

kya sang sada aaina-KHanon pe girega