ab adhure ishq ki takmil hi mumkin nahin

ab adhūre ishq kī takmīl hī mumkin nahīñ

kyā kareñ paiġhām kī tarsīl hī mumkin nahīñ

kyā use samjhā.ūñ kāġhaz par lakīreñ khīñch kar

jazba-e-benām kī tashkīl hī mumkin nahīñ

aise mausam meñ bhī sharh-e-dil kiye jaatā huuñ maiñ

jab ki is ijmāl kī tafsīl hī mumkin nahīñ

kis jagah uñglī rakhūñ kis harf ko kaise paḌhūñ

āyat-e-imkāñ tirī tartīl hī mumkin nahīñ

tohmat-e-rusvā.ī kaise ishq par rakhtā koī

aise kāmoñ meñ to aisī Dhiil hī mumkin nahīñ

kunj-e-nisyāñ meñ paḌe dhuñdlā ga.e us ke nuqūsh

ab to us ḳhush-rañg kī tamsīl hī mumkin nahīñ

aur bhī kuchh sūrateñ ban jā.eñgī rusvā.ī kī

ishq meñ 'tābish' faqat tazlīl hī mumkin nahīñ

ab adhure ishq ki takmil hi mumkin nahin

kya karen paigham ki tarsil hi mumkin nahin

kya use samjhaun kaghaz par lakiren khinch kar

jazba-e-benam ki tashkil hi mumkin nahin

aise mausam mein bhi sharh-e-dil kiye jata hun main

jab ki is ijmal ki tafsil hi mumkin nahin

kis jagah ungli rakhun kis harf ko kaise paDhun

aayat-e-imkan teri tartil hi mumkin nahin

tohmat-e-ruswai kaise ishq par rakhta koi

aise kaamon mein to aisi Dhil hi mumkin nahin

kunj-e-nisyan mein paDe dhundla gae us ke nuqush

ab to us KHush-rang ki tamsil hi mumkin nahin

aur bhi kuchh suraten ban jaengi ruswai ki

ishq mein 'tabish' faqat tazlil hi mumkin nahin