ab dil bujha bujha hai mujhe mar dijiye

ab dil bujhā bujhā hai mujhe maar dījiye

jiine meñ kyā rakhā hai mujhe maar dījiye

dil ke maraz kā ab nahīñ duniyā meñ kuchh ilaaj

ye ishq-e-lā-davā hai mujhe maar dījiye

maiñ be-gunāh huuñ to yahī hai mirī sazā

ye faisla huā hai mujhe maar dījiye

Dartā huuñ aa.ine ko lagāne se haath maiñ

kahtā ye ā.īna hai mujhe maar dījiye

maiñ huuñ vafā-shi.ār yahāñ jī ke kyā karūñ

ye daur-e-bevafā hai mujhe maar dījiye

vallāh be-nashsha na rahī merī koī shaam

ukhḌā huā nasha hai mujhe maar dījiye

ai jān-e-dil-bahār terī be-ruḳhī ke baad

ab mere paas kyā hai mujhe maar dījiye

tanhā.iyoñ kī qaid se ghabrā ke ek shaḳhs

āvāz de rahā hai mujhe maar dījiye

ek baat josh josh meñ sach kah gayā huuñ maiñ

tum ko burā lagā hai mujhe maar dījiye

tanhā.ī merī us se bhī dekhī nahīñ ga.ī

us ne bhī ye kahā hai mujhe maar dījiye

rashk-e-chaman banā hai ye 'arpit' mirā vajūd

ḳhushbū ko chhū liyā hai mujhe maar dījiye

ab dil bujha bujha hai mujhe mar dijiye

jine mein kya rakha hai mujhe mar dijiye

dil ke maraz ka ab nahin duniya mein kuchh ilaj

ye ishq-e-la-dawa hai mujhe mar dijiye

main be-gunah hun to yahi hai meri saza

ye faisla hua hai mujhe mar dijiye

Darta hun aaine ko lagane se hath main

kahta ye aaina hai mujhe mar dijiye

main hun wafa-shiar yahan ji ke kya karun

ye daur-e-bewafa hai mujhe mar dijiye

wallah be-nashsha na rahi meri koi sham

ukhDa hua nasha hai mujhe mar dijiye

ai jaan-e-dil-bahaar teri be-ruKHi ke baad

ab mere pas kya hai mujhe mar dijiye

tanhaiyon ki qaid se ghabra ke ek shaKHs

aawaz de raha hai mujhe mar dijiye

ek baat josh josh mein sach kah gaya hun main

tum ko bura laga hai mujhe mar dijiye

tanhai meri us se bhi dekhi nahin gai

us ne bhi ye kaha hai mujhe mar dijiye

rashk-e-chaman bana hai ye 'arpit' mera wajud

KHushbu ko chhu liya hai mujhe mar dijiye