ab dil ko humne banda-e-jaanan bana diya

ab dil ko ham ne banda-e-jānāñ banā diyā

ik kāfir-e-azal ko musalmāñ banā diyā

dushvāriyoñ ko ishq ne āsāñ banā diyā

ġham ko surūr dard ko darmāñ banā diyā

is jāñ-fazā itaab ke qurbān jā.iye

abrū kī har shikan ko rag-e-jāñ banā diyā

barq-e-jamāl-e-yār ye jalva hai yā hijāb

chashm-e-adā-shanās ko hairāñ banā diyā

ai zauq-e-jushtujū tirī himmat pe āfrīñ

manzil ko har qadam pe gurezāñ banā diyā

uTThī thī bahr-e-husn se ik mauj-e-be-qarār

fitrat ne is ko paikar-e-insāñ banā diyā

ai soz-e-nā-tamām kahāñ jaa.e ab ḳhalīl

ātish-kade ko bhī to gulistāñ banā diyā

vāraftgān-e-shauq ko kyā dair kyā haram

jis dar pe dī sadā dar-e-jānāñ banā diyā

aañsū kī kyā bisāt magar josh-e-ishq ne

qatre ko mauj mauj ko tūfāñ banā diyā

kyā ek maiñ hī maiñ huuñ is ā.īna-ḳhāne meñ

mujh ko to kashf-e-rāz ne hairāñ banā diyā

ab dil ko hum ne banda-e-jaanan bana diya

ek kafir-e-azal ko musalman bana diya

dushwariyon ko ishq ne aasan bana diya

gham ko surur dard ko darman bana diya

is jaan-faza itab ke qurban jaiye

abru ki har shikan ko rag-e-jaan bana diya

barq-e-jamal-e-yar ye jalwa hai ya hijab

chashm-e-ada-shanas ko hairan bana diya

ai zauq-e-jushtuju teri himmat pe aafrin

manzil ko har qadam pe gurezan bana diya

uTThi thi bahr-e-husn se ek mauj-e-be-qarar

fitrat ne is ko paikar-e-insan bana diya

ai soz-e-na-tamam kahan jae ab KHalil

aatish-kade ko bhi to gulistan bana diya

waraftgan-e-shauq ko kya dair kya haram

jis dar pe di sada dar-e-jaanan bana diya

aansu ki kya bisat magar josh-e-ishq ne

qatre ko mauj mauj ko tufan bana diya

kya ek main hi main hun is aaina-KHane mein

mujh ko to kashf-e-raaz ne hairan bana diya