ab dimagh-o-dil mein wo quwwat nahin wo dil nahin

ab dimāġh-o-dil meñ vo quvvat nahīñ vo dil nahīñ

'shād' ab ash.ār mere dar-ḳhur-e-mahfil nahīñ

tū mire ashk-e-nadāmat kī haqīqat kuchh na pūchh

us kā har qatra vo dariyā hai jahāñ sāhil nahīñ

ghar ḳhudā kā thā magar but is meñ aa kar bas ga.e

ab muraqqa.a hai hasīnoñ kā hamārā dil nahīñ

nukta-chīñ ho merī rindāna ravish par kyuuñ koī

maiñ koī zāhid nahīñ vaa.iz nahīñ aaqil nahīñ

parda-dārī kartī hai dar-parda lailā ishq kī

jazba-e-dil qais kā hai parda-e-mahmil nahīñ

inqalāb-e-dahr se ulTā zamāne kā varaq

ahl-e-mahfil vo nahīñ vo raunaq-e-mahfil nahīñ

hind meñ chalne lagī hai ab havā-e-inqalāb

'shād' sach hai ye jagah rahne ke ab qābil nahīñ

sāġhar-e-mai pesh kar ke shaiḳh kahlātā huuñ maiñ

hadiya-e-ahqar hai ye go aap ke qābil nahīñ

haq meñ ab āshiq ke dekheñ faisla hotā hai kyā

ishq kā da.avā huzūr-e-husn to bātil nahīñ

ab dimagh-o-dil mein wo quwwat nahin wo dil nahin

'shad' ab ashaar mere dar-KHur-e-mahfil nahin

tu mere ashk-e-nadamat ki haqiqat kuchh na puchh

us ka har qatra wo dariya hai jahan sahil nahin

ghar KHuda ka tha magar but is mein aa kar bas gae

ab muraqqa hai hasinon ka hamara dil nahin

nukta-chin ho meri rindana rawish par kyun koi

main koi zahid nahin waiz nahin aaqil nahin

parda-dari karti hai dar-parda laila ishq ki

jazba-e-dil qais ka hai parda-e-mahmil nahin

inqalab-e-dahr se ulTa zamane ka waraq

ahl-e-mahfil wo nahin wo raunaq-e-mahfil nahin

hind mein chalne lagi hai ab hawa-e-inqalab

'shad' sach hai ye jagah rahne ke ab qabil nahin

saghar-e-mai pesh kar ke shaiKH kahlata hun main

hadiya-e-ahqar hai ye go aap ke qabil nahin

haq mein ab aashiq ke dekhen faisla hota hai kya

ishq ka dawa huzur-e-husn to baatil nahin