ab kalam-e-narm-o-nazuk be-asar pate hain hum

ab kalām-e-narm-o-nāzuk be-asar paate haiñ ham

phuul kī pattī na hiire kā jigar paate haiñ ham

be-nishāñ manzil hujūm-e-rahguzar paate haiñ ham

ek rahrav ke liye sau rāhbar paate haiñ ham

garche haiñ aqvāl-e-zarrīñ se saje dīvār-o-dar

har nasīhat lauh-e-dil par be-asar paate haiñ ham

ab musalmāñ se haram kī pāsbānī ho chukī

niil ke sāhil ko nang-e-kāshġhar paate haiñ ham

tauq-e-zarrīñ asp-e-tāzī ke gale meñ hai to kyā

asp-e-tāzī meñ bhī ab ausāf-e-ḳhar paate haiñ ham

is chaman ke naunihāloñ kī ilāhī ḳhair ho

āshiyānoñ meñ chhupe barq-o-sharar paate haiñ ham

yuuñ to kahne ko haiñ 'manzar' sar hathelī par liye

maslahat-bīnoñ ko kab sīna-sipar paate haiñ ham

ab kalam-e-narm-o-nazuk be-asar pate hain hum

phul ki patti na hire ka jigar pate hain hum

be-nishan manzil hujum-e-rahguzar pate hain hum

ek rahraw ke liye sau rahbar pate hain hum

garche hain aqwal-e-zarrin se saje diwar-o-dar

har nasihat lauh-e-dil par be-asar pate hain hum

ab musalman se haram ki pasbani ho chuki

nil ke sahil ko nang-e-kashghar pate hain hum

tauq-e-zarrin asp-e-tazi ke gale mein hai to kya

asp-e-tazi mein bhi ab ausaf-e-KHar pate hain hum

is chaman ke naunihaalon ki ilahi KHair ho

aashiyanon mein chhupe barq-o-sharar pate hain hum

yun to kahne ko hain 'manzar' sar hatheli par liye

maslahat-binon ko kab sina-sipar pate hain hum