ab ke barsat ki rut aur bhi bhaDkili hai

ab ke barsāt kī rut aur bhī bhaḌkīlī hai

jism se aag nikaltī hai qabā giilī hai

sochtā huuñ ki ab anjām-e-safar kyā hogā

log bhī kāñch ke haiñ raah bhī pathrīlī hai

shiddat-e-karb meñ hañsnā to hunar hai merā

haath hī saḳht haiñ zanjīr kahāñ Dhīlī hai

gard ā.ankhoñ meñ sahī daaġh to chehre pe nahīñ

lafz dhuñdle haiñ magar fikr to chamkīlī hai

ghol detā hai samā.at meñ vo mīThā lahja

kis ko ma.alūm ki ye qand bhī zahrīlī hai

pahle rag rag se mirī ḳhuun nichoḌā us ne

ab ye kahtā hai ki rañgat hī mirī piilī hai

mujh ko be-rañg hī kar deñ na kahīñ rañg itne

sabz mausam hai havā surḳh fazā niilī hai

merī parvāz kisī ko nahīñ bhātī to na bhaa.e

kyā karūñ zehn 'muzaffar' mirā jibrīlī hai

ab ke barsat ki rut aur bhi bhaDkili hai

jism se aag nikalti hai qaba gili hai

sochta hun ki ab anjam-e-safar kya hoga

log bhi kanch ke hain rah bhi pathrili hai

shiddat-e-karb mein hansna to hunar hai mera

hath hi saKHt hain zanjir kahan Dhili hai

gard aaankhon mein sahi dagh to chehre pe nahin

lafz dhundle hain magar fikr to chamkili hai

ghol deta hai samaat mein wo miTha lahja

kis ko malum ki ye qand bhi zahrili hai

pahle rag rag se meri KHun nichoDa us ne

ab ye kahta hai ki rangat hi meri pili hai

mujh ko be-rang hi kar den na kahin rang itne

sabz mausam hai hawa surKH faza nili hai

meri parwaz kisi ko nahin bhati to na bhae

kya karun zehn 'muzaffar' mera jibrili hai