ab khilaunon se ghar sajata hun

ab khilaunoñ se ghar sajātā huuñ

kisht-e-dil meñ ġhazal ugātā huuñ

chehra-e-ġham udaas hai jab se

ḳhalvat-e-shab meñ gungunātā huuñ

zindagī haath thaam letī hai

jab kabhī ḳhud se ruuTh jaatā huuñ

oḌh kar be-ḳhudī kā sabz ġhilāf

zindagī kā surāġh paatā huuñ

koī mujh ko surāġh de merā

dar-ba-dar ye sadā lagātā huuñ

qatra-e-ḳhūñ qalam se Tapke hai

dasht meñ phuul jab khilātā huuñ

apnī kuchh bhī ḳhabar nahīñ rahtī

lamha lamha maiñ TuuT jaatā huuñ

mujh ko shikva nahīñ kisī se koī

aa.ina ḳhud ko ab dikhātā huuñ

maiñ bhī pairāhan-e-ġhazal meñ 'nāz'

apnī rūdād-e-ġham sunātā huuñ

ab khilaunon se ghar sajata hun

kisht-e-dil mein ghazal ugata hun

chehra-e-gham udas hai jab se

KHalwat-e-shab mein gungunata hun

zindagi hath tham leti hai

jab kabhi KHud se ruTh jata hun

oDh kar be-KHudi ka sabz ghilaf

zindagi ka suragh pata hun

koi mujh ko suragh de mera

dar-ba-dar ye sada lagata hun

qatra-e-KHun qalam se Tapke hai

dasht mein phul jab khilata hun

apni kuchh bhi KHabar nahin rahti

lamha lamha main TuT jata hun

mujh ko shikwa nahin kisi se koi

aaina KHud ko ab dikhata hun

main bhi pairahan-e-ghazal mein 'naz'

apni rudad-e-gham sunata hun