ab koi aur musibat to na pali jae

ab koī aur musībat to na paalī jaa.e

us kī yādoñ se bhī ab jaan chhuḌā lī jaa.e

vo bhī mere liye kuchh sochtā hai sochtā huuñ

kaise dil se mire ye ḳhām-ḳhayālī jaa.e

ziist be-rabt hai par hai to ḳhudā kī ne.amat

jis tarah se bhī ye nibhtī hai nibhā lī jaa.e

aise bhī dost haiñ kuchh jin kā yahī maqsad hai

vaar kyā un kī koī baat na ḳhālī jaa.e

yaad jis kī hameñ sone nahīñ detī aksar

us sitamgar kī bhī ab niiñd churā lī jaa.e

us ke dar se maiñ yahī soch ke lauT aayā huuñ

'zeb' ab ke bhī na dastak mirī ḳhālī jaa.e

ab koi aur musibat to na pali jae

us ki yaadon se bhi ab jaan chhuDa li jae

wo bhi mere liye kuchh sochta hai sochta hun

kaise dil se mere ye KHam-KHayali jae

zist be-rabt hai par hai to KHuda ki neamat

jis tarah se bhi ye nibhti hai nibha li jae

aise bhi dost hain kuchh jin ka yahi maqsad hai

war kya un ki koi baat na KHali jae

yaad jis ki hamein sone nahin deti aksar

us sitamgar ki bhi ab nind chura li jae

us ke dar se main yahi soch ke lauT aaya hun

'zeb' ab ke bhi na dastak meri KHali jae