ab kya gila ki ruh ko khilne nahin diya

ab kyā gila ki ruuh ko khilne nahīñ diyā

us ne to mujh ko ḳhaak meñ milne nahīñ diyā

koshish havā ne raat bhar apnī sī kī magar

zanjīr-e-dar ko maiñ ne hī hilne nahīñ diyā

ik baar us se baat to maiñ kar ke dekh luuñ

itnā bhī aasrā mujhe dil ne nahīñ diyā

kartā vo apne aap ko kyā mujh pe munkashif

us ne to mujh se bhī mujhe milne nahīñ diyā

qaa.em nahīñ rahā faqat apnī hī baat par

apnī jagah se mujh ko bhī milne nahīñ diyā

āḳhir koī subūt to ho be-gunāhī kā

dāman ko is ḳhayāl ne silne nahīñ diyā

'rāshid' havā se maañg ke kyuuñ sharmsār ho

jo tum ko āb-o-ātish-o-gil ne nahīñ diyā

ab kya gila ki ruh ko khilne nahin diya

us ne to mujh ko KHak mein milne nahin diya

koshish hawa ne raat bhar apni si ki magar

zanjir-e-dar ko main ne hi hilne nahin diya

ek bar us se baat to main kar ke dekh lun

itna bhi aasra mujhe dil ne nahin diya

karta wo apne aap ko kya mujh pe munkashif

us ne to mujh se bhi mujhe milne nahin diya

qaem nahin raha faqat apni hi baat par

apni jagah se mujh ko bhi milne nahin diya

aaKHir koi subut to ho be-gunahi ka

daman ko is KHayal ne silne nahin diya

'rashid' hawa se mang ke kyun sharmsar ho

jo tum ko aab-o-atish-o-gil ne nahin diya