ab main rashan ki qataron mein nazar aata hun

ab maiñ rāshan kī qatāroñ meñ nazar aatā huuñ

apne khetoñ se bichhaḌne kī sazā paatā huuñ

itnī mahñgā.ī ki bāzār se kuchh laatā huuñ

apne bachchoñ meñ use baañT ke sharmātā huuñ

mujh ko Dar hai ki tirā bhed na khul jaa.e kahīñ

merī 'ādat hai ki maiñ niiñd meñ chillātā huuñ

zaḳhmī nīñdoñ kā lahū poñchhne kī koshish meñ

jāgte jāgte thak jaatā huuñ so jaatā huuñ

zulm bhī mujh pe huā mujh pe ye tohmat bhī lagī

maiñ hī duniyā meñ fasādoñ kā janamdātā huuñ

khīñch le jaa.e na chādar hī samajh kar koī

maiñ 'ḳhalīl' aaj kafan oḌh ke so jaatā huuñ

ab main rashan ki qataron mein nazar aata hun

apne kheton se bichhaDne ki saza pata hun

itni mahngai ki bazar se kuchh lata hun

apne bachchon mein use banT ke sharmata hun

mujh ko Dar hai ki tera bhed na khul jae kahin

meri 'adat hai ki main nind mein chillata hun

zaKHmi nindon ka lahu ponchhne ki koshish mein

jagte jagte thak jata hun so jata hun

zulm bhi mujh pe hua mujh pe ye tohmat bhi lagi

main hi duniya mein fasadon ka janamdata hun

khinch le jae na chadar hi samajh kar koi

main 'KHalil' aaj kafan oDh ke so jata hun