ab motaqid-e-gardish-e-dauran na rahe hum

ab mo'taqid-e-gardish-e-daurāñ na rahe ham

qābil tire ai dīda-e-jānāñ na rahe ham

kab mil ke unheñ dil kī tamannā.eñ bar aa.iiñ

kab un se judā ho ke pareshāñ na rahe ham

ye baat digar hai ki na the rū-ba-rū un ke

kab diid kā dil meñ liye armāñ na rahe ham

qismat to zarā dekho kab aa.ī haiñ bahāreñ

jab qābil-e-gul-gasht-e-gulistāñ na rahe ham

saaqī kī nigāhoñ ne pilā dī hai kuchh aisī

jām-e-mai-e-gul-fām ke ḳhvāhāñ na rahe ham

ab dard hī rāhat sī hameñ dene lagā hai

chāragaro minnat-kash-e-darmāñ na rahe ham

'āfat' rah-e-ulfat meñ hañsī aa.ī thī ik din

ba.ad us ke kabhī ziist meñ ḳhandāñ na rahe ham

ab mo'taqid-e-gardish-e-dauran na rahe hum

qabil tere ai dida-e-jaanan na rahe hum

kab mil ke unhen dil ki tamannaen bar aain

kab un se juda ho ke pareshan na rahe hum

ye baat digar hai ki na the ru-ba-ru un ke

kab did ka dil mein liye arman na rahe hum

qismat to zara dekho kab aai hain bahaaren

jab qabil-e-gul-gasht-e-gulistan na rahe hum

saqi ki nigahon ne pila di hai kuchh aisi

jam-e-mai-e-gul-fam ke KHwahan na rahe hum

ab dard hi rahat si hamein dene laga hai

chaaragaro minnat-kash-e-darman na rahe hum

'afat' rah-e-ulfat mein hansi aai thi ek din

baad us ke kabhi zist mein KHandan na rahe hum