ab mujhko ruKHsat hona hai kuchh mera haar-singhaar karo

ab mujh ko ruḳhsat honā hai kuchh merā hār-siñghār karo

kyuuñ der lagātī ho sakhiyo jaldī se mujhe tayyār karo

ro ro kar āñkheñ laal huiiñ tum kyuuñ sakhiyo behāl huiiñ

ab Dolī uThne vaalī hai lo aao mujh ko pyaar karo

ye kaisā anokhā joḌā hai jo aaj mujhe pahnāyā hai

maiñ hūroñ jaisī dulhan banī ab uTTho aur dīdār karo

ik haar hai surḳh gulāboñ kā ik chādar surḳh gulāboñ kī

aur kitnā ruup chaḌhā mujh par is baat kā to iqrār karo

ik baar yahāñ se jā.ūñgī maiñ lauT ke phir kab ā.ūñgī

tum āh-o-zārī laakh karo tum minnat sau sau baar karo

haañ yaad aayā is bastī meñ kuchh diye jalā.e the maiñ ne

tum un ko bujhne mat denā bas ye va.ada ik baar karo

ab mujh ko ruKHsat hona hai kuchh mera haar-singhaar karo

kyun der lagati ho sakhiyo jaldi se mujhe tayyar karo

ro ro kar aankhen lal huin tum kyun sakhiyo behaal huin

ab Doli uThne wali hai lo aao mujh ko pyar karo

ye kaisa anokha joDa hai jo aaj mujhe pahnaya hai

main huron jaisi dulhan bani ab uTTho aur didar karo

ek haar hai surKH gulabon ka ek chadar surKH gulabon ki

aur kitna rup chaDha mujh par is baat ka to iqrar karo

ek bar yahan se jaungi main lauT ke phir kab aaungi

tum aah-o-zari lakh karo tum minnat sau sau bar karo

han yaad aaya is basti mein kuchh diye jalae the main ne

tum un ko bujhne mat dena bas ye wada ek bar karo