ab na kuchh sunñā na sunānā raat guzartī jaatī hai
ḳhatm hai ab be-kahe fasāna raat guzartī jaatī hai
jaldī kyā hai barq-e-tabassum dhuāñ banegā ḳhud aañsū
din ho le phir aag lagānā raat guzartī jaatī hai
tasht-e-tilā.ī meñ sūraj ke ek ik ashk parakh lenā
vaqt-e-sahar ilzām lagānā raat guzartī jaatī hai
rah nahīñ sakte mujrim aañsū qaidī habābī shīshe meñ
vaqt pe chhalkegā paimāna raat guzartī jaatī hai
bistar par surḳh añgāroñ ke dhueñ kī chādar oḌhe hue
sotā rahtā hai parvāna raat guzartī jaatī hai
zinda ḳhuun ke aañsū haiñ ye thoḌī der taḌapne de
vaqt-e-sahar miTTī meñ milānā raat guzartī jaatī hai
shabnam se phūloñ ke kaTore ḳhālī ho jā.eñge 'sirāj'
ashkoñ se bhar lo paimāna raat guzartī jaatī hai
ab na kuchh sunna na sunana raat guzarti jati hai
KHatm hai ab be-kahe fasana raat guzarti jati hai
jaldi kya hai barq-e-tabassum dhuan banega KHud aansu
din ho le phir aag lagana raat guzarti jati hai
tasht-e-tilai mein suraj ke ek ek ashk parakh lena
waqt-e-sahar ilzam lagana raat guzarti jati hai
rah nahin sakte mujrim aansu qaidi hababi shishe mein
waqt pe chhalkega paimana raat guzarti jati hai
bistar par surKH angaron ke dhuen ki chadar oDhe hue
sota rahta hai parwana raat guzarti jati hai
zinda KHun ke aansu hain ye thoDi der taDapne de
waqt-e-sahar miTTi mein milana raat guzarti jati hai
shabnam se phulon ke kaTore KHali ho jaenge 'siraj'
ashkon se bhar lo paimana raat guzarti jati hai
Source:
Rooh-e-Ghazal,Pachas Sala Intekhab (Pg. 93)
-
- Edition: 1993
- Publisher: Anjuman-e-Rooh-e-Adab, Allahabad
- Year of Publication: 1993
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
