ab na wo sar hai na sauda hai na saudai hai

ab na vo sar hai na saudā hai na saudā.ī hai

husn ḳhud apne hī jalvoñ kā tamāshā.ī hai

raat añdherī hai bayābāñ bhī hai tanhā.ī hai

hasrat-e-dīd ḳhudā jaane kahāñ laa.ī hai

jalva-e-husn-e-butāñ bū-e-gul-o-naġhma sā

itne pardoñ meñ bhī us shoḳh kī rusvā.ī hai

yā vo din the ki tirā qurb thā hāsil mujh ko

yā bas ab yaad tirī mūnis-e-tanhā.ī hai

al-madad zauq-e-fanā al-madad ai jazba-e-ishq

merī fitrat mujhe phir hosh meñ le aa.ī hai

jaane tū hai ki tarī yaad magar dil meñ mire

tujh se miltī huī ik shakl nazar aa.ī hai

saikḌoñ baar mujhe ā.ina-e-hastī meñ

apnī sūrat tirī sūrat meñ nazar aa.ī hai

dekh le be-par-o-bālī pe bhī parvāz mirī

itnā kah de ki gulistāñ meñ bahār aa.ī hai

tab maiñ samjhūñ ki huī josh-e-junūñ kī takmīl

ḳhud vo kahne lageñ 'vahshī' mirā saudā.ī hai

ab na wo sar hai na sauda hai na saudai hai

husn KHud apne hi jalwon ka tamashai hai

raat andheri hai bayaban bhi hai tanhai hai

hasrat-e-did KHuda jaane kahan lai hai

jalwa-e-husn-e-butan bu-e-gul-o-naghma sa

itne pardon mein bhi us shoKH ki ruswai hai

ya wo din the ki tera qurb tha hasil mujh ko

ya bas ab yaad teri munis-e-tanhai hai

al-madad zauq-e-fana al-madad ai jazba-e-ishq

meri fitrat mujhe phir hosh mein le aai hai

jaane tu hai ki tari yaad magar dil mein mere

tujh se milti hui ek shakl nazar aai hai

saikDon bar mujhe aaina-e-hasti mein

apni surat teri surat mein nazar aai hai

dekh le be-par-o-baali pe bhi parwaz meri

itna kah de ki gulistan mein bahaar aai hai

tab main samjhun ki hui josh-e-junun ki takmil

KHud wo kahne lagen 'wahshi' mera saudai hai