ab nae ruKH se haqaeq ko ulaT kar dekho

ab na.e ruḳh se haqā.eq ko ulaT kar dekho

jin pe chalte rahe un rāhoñ se kaT kar dekho

ek āvāz bulātī hai palaT kar dekho

duur tak koī nahīñ kitnā bhī haT kar dekho

ye jo āvāzeñ haiñ patthar kā banā detī haiñ

ghar se nikle ho to pīchhe na palaT kar dekho

dil meñ chingārī kisī dukh kī dabī ho shāyad

dekho is raakh kī partoñ ko ulaT kar dekho

kaun aa.egā kise fursat-e-ġham-ḳhvārī hai

aaj ḳhud apnī hī bāñhoñ meñ simaT kar dekho

chhoḌ jaate haiñ makīñ apne badan kī ḳhushbū

ghar kī dīvāroñ se ik baar lipaT kar dekho

kuchh tapish aur sivā hotī hai dil kī 'tāriq'

ab to jis yaad ke pahlū meñ simaT kar dekho

ab nae ruKH se haqaeq ko ulaT kar dekho

jin pe chalte rahe un rahon se kaT kar dekho

ek aawaz bulati hai palaT kar dekho

dur tak koi nahin kitna bhi haT kar dekho

ye jo aawazen hain patthar ka bana deti hain

ghar se nikle ho to pichhe na palaT kar dekho

dil mein chingari kisi dukh ki dabi ho shayad

dekho is rakh ki parton ko ulaT kar dekho

kaun aaega kise fursat-e-gham-KHwari hai

aaj KHud apni hi banhon mein simaT kar dekho

chhoD jate hain makin apne badan ki KHushbu

ghar ki diwaron se ek bar lipaT kar dekho

kuchh tapish aur siwa hoti hai dil ki 'tariq'

ab to jis yaad ke pahlu mein simaT kar dekho