ab nahin koi jabin mah-e-daraKHshan ki tarah

ab nahīñ koī jabīñ māh-e-daraḳhshāñ kī tarah

ab koī aañkh nahīñ chashm-e-ġhazālāñ kī tarah

ab kahīñ bhī nazar aate nahīñ aariz ke gulāb

ab koī zulf kahāñ sumbul-o-raihāñ kī tarah

is bhare shahr meñ ab koī zuleḳhā hī nahīñ

ek chehra bhī nahīñ sūrat-e-jānāñ kī tarah

kījiye bhī to kahāñ us ruḳh-e-zebā kī talāsh

koī kūcha hī nahīñ kū-e-nigārāñ kī tarah

zindagī ban ga.ī ik soz-e-darūñ tere baġhair

kaaTe kaTtī hī nahīñ hai shab-e-hijrāñ kī tarah

le ke aa.ī tirī yādoñ ke mahakte hue phuul

koī mausam hī nahīñ fasl-e-bahārāñ kī tarah

jān-e-jāñ merī vafāoñ kā sila do ki na do

kaun chāhegā tumheñ is dil-e-nādāñ kī tarah

ab nahin koi jabin mah-e-daraKHshan ki tarah

ab koi aankh nahin chashm-e-ghazalan ki tarah

ab kahin bhi nazar aate nahin aariz ke gulab

ab koi zulf kahan sumbul-o-raihan ki tarah

is bhare shahr mein ab koi zuleKHa hi nahin

ek chehra bhi nahin surat-e-jaanan ki tarah

kijiye bhi to kahan us ruKH-e-zeba ki talash

koi kucha hi nahin ku-e-nigaran ki tarah

zindagi ban gai ek soz-e-darun tere baghair

kaTe kaTti hi nahin hai shab-e-hijran ki tarah

le ke aai teri yaadon ke mahakte hue phul

koi mausam hi nahin fasl-e-bahaaran ki tarah

jaan-e-jaan meri wafaon ka sila do ki na do

kaun chahega tumhein is dil-e-nadan ki tarah