ab naqab-e-ruKH-e-zeba nahin dekha jata

ab naqāb-e-ruḳh-e-zebā nahīñ dekhā jaatā

chāñd ham se pas-e-parda nahīñ dekhā jaatā

ab to lillāh ulaT do ruḳh-e-raushan se naqāb

ham se mahfil meñ añdherā nahīñ dekhā jaatā

un ke hisse ke jo ġham haiñ mujhe de de yā-rab

un kā utrā huā chehra nahīñ dekhā jaatā

haa.e un nargisī āñkhoñ meñ chhalakte aañsū

kaise dekhūñ ye nazāra nahīñ dekhā jaatā

dekhne kī bhī tamannā hai in āñkhoñ ko magar

sāmne aa.eñ to jalva nahīñ dekhā jaatā

tum milo ġhair se aur vo tumheñ hañs kar dekhe

kaisā patthar ho kaleja nahīñ dekhā jaatā

ab tumheñ maut hī aa jaa.e to behtar 'kāmil'

ham se ye haal tumhārā nahīñ dekhā jaatā

ab naqab-e-ruKH-e-zeba nahin dekha jata

chand hum se pas-e-parda nahin dekha jata

ab to lillah ulaT do ruKH-e-raushan se naqab

hum se mahfil mein andhera nahin dekha jata

un ke hisse ke jo gham hain mujhe de de ya-rab

un ka utra hua chehra nahin dekha jata

hae un nargisi aankhon mein chhalakte aansu

kaise dekhun ye nazara nahin dekha jata

dekhne ki bhi tamanna hai in aankhon ko magar

samne aaen to jalwa nahin dekha jata

tum milo ghair se aur wo tumhein hans kar dekhe

kaisa patthar ho kaleja nahin dekha jata

ab tumhein maut hi aa jae to behtar 'kaamil'

hum se ye haal tumhaara nahin dekha jata