ab tak mere ahwal se wan be-KHabari hai

ab tak mire ahvāl se vaañ be-ḳhabarī hai

ai nāla-e-jāñ-soz ye kyā be-asarī hai

ho jaave hai us kī saf-e-mizhgāñ se muqābil

is dil ko mire dekhiyo kyā be-jigarī hai

kis baaġh se aatī hai batā mujh ko ki phir aaj

kuchh aur hī bū tujh meñ nasīm-e-saharī hai

terā hī talabgār hai dil donoñ jahāñ meñ

ne huur kā juuyā hai ne mushtāq-e-parī hai

hai aur hī kuchh āb-o-havā shahr-e-adam kī

har shaḳhs jo 'bedār' udhar ko safarī hai

ab tak mere ahwal se wan be-KHabari hai

ai nala-e-jaan-soz ye kya be-asari hai

ho jawe hai us ki saf-e-mizhgan se muqabil

is dil ko mere dekhiyo kya be-jigari hai

kis bagh se aati hai bata mujh ko ki phir aaj

kuchh aur hi bu tujh mein nasim-e-sahari hai

tera hi talabgar hai dil donon jahan mein

ne hur ka juya hai ne mushtaq-e-pari hai

hai aur hi kuchh aab-o-hawa shahr-e-adam ki

har shaKHs jo 'bedar' udhar ko safari hai