ab tere gham ke andheron mein utar jaunga

ab tire ġham ke añdheroñ meñ utar jā.ūñgā

ḳhud hī ban ke maiñ vahāñ shams-o-qamar jā.ūñgā

ik nazar pyaar se dekho to navāzish hogī

phir na ā.uñgā kabhī aise nagar jā.ūñgā

phir se be-sāḳhta hichkī jo mujhe aa.egī

naam terā hī sadā lūñgā jidhar jā.ūñgā

mil ga.ī tere ḳhayāloñ se tajallī dil ko

talḳh rāhoñ pe bhī be-ḳhauf-o-ḳhatar jā.ūñgā

har Dagar TeḌhī hai tirchhī hai zamāna be-dil

zid hai mujh ko ki tujhe DhūñD ke ghar jā.ūñgā

merī hastī nahīñ aḳhbār ki har koī paḌhe

maiñ risāla huuñ sar-e-ahl-e-nazar jā.ūñgā

'dil-navāz' aaj talak kyoñ mujhe manzil na milī

kyā yuuñ hī umr kī rāhoñ se guzar jā.ūñgā

ab tere gham ke andheron mein utar jaunga

KHud hi ban ke main wahan shams-o-qamar jaunga

ek nazar pyar se dekho to nawazish hogi

phir na aaunga kabhi aise nagar jaunga

phir se be-saKHta hichki jo mujhe aaegi

nam tera hi sada lunga jidhar jaunga

mil gai tere KHayalon se tajalli dil ko

talKH rahon pe bhi be-KHauf-o-KHatar jaunga

har Dagar TeDhi hai tirchhi hai zamana be-dil

zid hai mujh ko ki tujhe DhunD ke ghar jaunga

meri hasti nahin aKHbar ki har koi paDhe

main risala hun sar-e-ahl-e-nazar jaunga

'dil-nawaz' aaj talak kyon mujhe manzil na mili

kya yun hi umr ki rahon se guzar jaunga