ab tere hijr mein ek pal na guzara jae

ab tire hijr meñ ik pal na guzārā jaa.e

ye na ho qais tirā dasht meñ maarā jaa.e

un ke dil aur zabāñ narm huā karte haiñ

dasht vāloñ ko mohabbat se pukārā jaa.e

mujh ko manzil pe nahīñ aur kahīñ jaanā hai

mujh ko manzil se bahut duur utārā jaa.e

zindagī hai mire mahbūb aziyyat vaalī

ye tirī zulf nahīñ jis ko sañvārā jaa.e

jī to kartā hai ki āñkhoñ meñ muqayyad kar luuñ

merī āñkhoñ se na mahrūm nazārā jaa.e

ye jo ashkoñ kā samundar nazar aatā hai ise

aañkh kī sāhilī paTTī pe utārā jaa.e

phir bhī rahtī hai kamī nok-palak meñ baaqī

vo ġhazal jaisā badan jitnā sañvārā jaa.e

un ke ehsān zamāne pe bahut haiñ 'jāmī'

koī bhī phal na daraḳhtoñ se utārā jaa.e

ab tere hijr mein ek pal na guzara jae

ye na ho qais tera dasht mein mara jae

un ke dil aur zaban narm hua karte hain

dasht walon ko mohabbat se pukara jae

mujh ko manzil pe nahin aur kahin jaana hai

mujh ko manzil se bahut dur utara jae

zindagi hai mere mahbub aziyyat wali

ye teri zulf nahin jis ko sanwara jae

ji to karta hai ki aankhon mein muqayyad kar lun

meri aankhon se na mahrum nazara jae

ye jo ashkon ka samundar nazar aata hai ise

aankh ki sahili paTTi pe utara jae

phir bhi rahti hai kami nok-palak mein baqi

wo ghazal jaisa badan jitna sanwara jae

un ke ehsan zamane pe bahut hain 'jami'

koi bhi phal na daraKHton se utara jae