ab to ye bhi hone laga hai hum mein un mein baat nahin

ab to ye bhī hone lagā hai ham meñ un meñ baat nahīñ

duniyā vaale pūchhte haiñ kyā pahle se hālāt nahīñ

ek agar ho ishq kī baazī to phir koī baat nahīñ

kaun sā aisā khel hai jis meñ ham ne khaa.ī maat nahīñ

aañkh se aañsū ban ke baheñ jo aise sab jazbāt nahīñ

dil kā zaḳhm chhupā ke jiinā sab ke bas kī baat nahīñ

din to din hai tere bin ab raat kī bhī auqāt nahīñ

tum mil jaao aur sab baazī hāreñ bhī to maat nahīñ

'zāhid' kī ye saarī qanā.at kyā terī sauġhāt nahīñ

thoḌī pī kar ziyāda bahke aisī us kī zaat nahīñ

ab to ye bhi hone laga hai hum mein un mein baat nahin

duniya wale puchhte hain kya pahle se haalat nahin

ek agar ho ishq ki bazi to phir koi baat nahin

kaun sa aisa khel hai jis mein hum ne khai mat nahin

aankh se aansu ban ke bahen jo aise sab jazbaat nahin

dil ka zaKHm chhupa ke jina sab ke bas ki baat nahin

din to din hai tere bin ab raat ki bhi auqat nahin

tum mil jao aur sab bazi haaren bhi to mat nahin

'zahid' ki ye sari qanaat kya teri saughat nahin

thoDi pi kar ziyaada bahke aisi us ki zat nahin