ab to yun lab pe mere harf-e-sadaqat aae

ab to yuuñ lab pe mire harf-e-sadāqat aa.e

nā-gahāñ shahr pe jaise koī aafat aa.e

maslahat ho ga.ī mamnuā shajar kī sūrat

laakh rokūñ magar us par hī tabī.at aa.e

daḳhl ḳhushiyoñ kā mirī ziist meñ kaise ho ki jab

terā ġham bhī ġham-e-daurāñ kī badaulat aa.e

jis pe maiñ chhāp sakūñ sikka-e-ḳhud-muḳhtārī

zindagī meñ koī aisī bhī to saa.at aa.e

raat bhar dhotā huuñ tāroñ kī nadī meñ āñkheñ

tab kahīñ jā ke nazar sub.h kī sūrat aa.e

barf hālāt kī ban jaa.e na poshāk-e-hayāt

itnī to terī tamannā meñ harārat aa.e

vus.at-e-lamha pe rakhtā huuñ nigāheñ 'rūhī'

kyuuñ na tahrīr meñ fardā kī ibārat aa.e

ab to yun lab pe mere harf-e-sadaqat aae

na-gahan shahr pe jaise koi aafat aae

maslahat ho gai mamnua shajar ki surat

lakh rokun magar us par hi tabiat aae

daKHl KHushiyon ka meri zist mein kaise ho ki jab

tera gham bhi gham-e-dauran ki badaulat aae

jis pe main chhap sakun sikka-e-KHud-muKHtari

zindagi mein koi aisi bhi to saat aae

raat bhar dhota hun taron ki nadi mein aankhen

tab kahin ja ke nazar subh ki surat aae

barf haalat ki ban jae na poshak-e-hayat

itni to teri tamanna mein hararat aae

wusat-e-lamha pe rakhta hun nigahen 'ruhi'

kyun na tahrir mein farda ki ibarat aae