ab yahi saya-e-diwar mera ghar Thahra

ab yahī sāya-e-dīvār mirā ghar Thahrā

use chhoḌūñ bhī to kaise mirā paikar Thahrā

ab kisī aur jazīre kā safar kyoñ kiije

maiñ bhī insān huuñ āshob kā ḳhūgar Thahrā

vaqt kā apnā safar abr kī apnī manzil

ek pal ke liye saaya mire dar par Thahrā

phir use pyaas ke sahrā se pukārā maiñ ne

maiñ ki mavvāj samundar kā shanāvar Thahrā

kyoñ na bargashta ho qismat kā sitāra mujh se

ki sitāra bhī vahī māh-e-munavvar Thahrā

zabt lāzim thā magar aañkh meñ aañsū bhar aa.e

aa ke sailāb mere ghar ke barābar Thahrā

rif.at-e-dār se insāñ kā bharam hai varna

kaun be-minnat-e-sultāñ sar-e-mimbar Thahrā

ab yahi saya-e-diwar mera ghar Thahra

use chhoDun bhi to kaise mera paikar Thahra

ab kisi aur jazire ka safar kyon kije

main bhi insan hun aashob ka KHugar Thahra

waqt ka apna safar abr ki apni manzil

ek pal ke liye saya mere dar par Thahra

phir use pyas ke sahra se pukara main ne

main ki mawwaj samundar ka shanawar Thahra

kyon na bargashta ho qismat ka sitara mujh se

ki sitara bhi wahi mah-e-munawwar Thahra

zabt lazim tha magar aankh mein aansu bhar aae

aa ke sailab mere ghar ke barabar Thahra

rifat-e-dar se insan ka bharam hai warna

kaun be-minnat-e-sultan sar-e-mimbar Thahra