abad tanha ajal tanha mile sab bahr-o-bar tanha

abad tanhā ajal tanhā mile sab bahr-o-bar tanhā

jahāñ tak ho sakā kartā rahā maiñ bhī safar tanhā

vo hī vo hai udhar tanhā maiñ hī maiñ huuñ idhar tanhā

ye tanhā.ī ajab shai hai ḳhudā tanhā bashar tanhā

basar kartā hai muddat se mire jaisā koī mujh meñ

use kah do chalā jaa.e mujhe vo chhoḌ kar tanhā

maiñ terī samt aa jā.ūñ ki jā.ūñ ġhair kī jānib

kashākash meñ huuñ uljhā darmiyān-e-ḳhair-o-shar tanhā

ye duniyā gaañv meñ badlī hue haiñ rābte āsāñ

magar is bhiiḌ meñ hotā gayā ik ik bashar tanhā

ye tanhā.ī ye ḳhāmoshī ye vīrānī ye añdhiyārā

isī mahfil meñ rahtā huuñ maiñ ab shām-o-sahar tanhā

khule haiñ raaz sab us ke haqīqat hai ayaañ lekin

ulajhtā hai na jaane kyoñ ḳhayāl-e-be-ḳhabar tanhā

abad tanha ajal tanha mile sab bahr-o-bar tanha

jahan tak ho saka karta raha main bhi safar tanha

wo hi wo hai udhar tanha main hi main hun idhar tanha

ye tanhai ajab shai hai KHuda tanha bashar tanha

basar karta hai muddat se mere jaisa koi mujh mein

use kah do chala jae mujhe wo chhoD kar tanha

main teri samt aa jaun ki jaun ghair ki jaanib

kashakash mein hun uljha darmiyan-e-KHair-o-shar tanha

ye duniya ganw mein badli hue hain rabte aasan

magar is bhiD mein hota gaya ek ek bashar tanha

ye tanhai ye KHamoshi ye virani ye andhiyara

isi mahfil mein rahta hun main ab sham-o-sahar tanha

khule hain raaz sab us ke haqiqat hai ayan lekin

ulajhta hai na jaane kyon KHayal-e-be-KHabar tanha