abas hai duri ka uske shikwa baghal mein apne wo dil-ruba hai

abas hai duurī kā us ke shikva baġhal meñ apne vo dil-rubā hai

chubhī hai qālib meñ jis tarah jaañ use tarīqe se vo chhupā hai

makāñ bhī hai vo makīñ bhī hai vo vahī milā hai vahī judā hai

usī kā jalva har ek sū hai vahī hai zāhir vahī chhupā hai

ġham-e-mohabbat hai us kā jis ko nahīñ vo ġham ain hai vo rāhat

ḳharāb jo ishq meñ hai us ke nahīñ vo bigḌā banā huā hai

na pārsā.ī namāz se hai na roza-dārī hai zohd-o-taqvā

mai-e-mohabbat piye jo us kī vahī haqīqat meñ pārsā hai

vo rañj āḳhir ko hogā rāhat vo marg-e-umr-e-davām hogī

jo ishq-e-sādiq meñ mar miTā tū to phir abas shākī-e-jafā hai

na koī dushman na dost apnā na nek-o-bad se hameñ ta.alluq

jo chashm-e-vahdat se ham ne dekhā na kuchh burā hai na kuchh bhalā hai

jo dard-e-hijrāñ se jāñ-ba-lab hai ilaaj mumkin hai us kā kyūñkar

masīh samjhe haiñ jis ko vo ḳhud maraz meñ ulfat kī mubtalā hai

jahāñ meñ sad.hā hazār-hā ghar base jo the vo ujaḌ ga.e haiñ

na hogā vīrān ḳhāna-e-dil jahāñ vo but aa ke bas gayā hai

jo hai talabgār us kā sādiq huā hai donoñ-jahāñ se fāriġh

na hūr-o-ġhilmāñ kā hai vo ḳhvāhāñ na vo hasīnoñ pe shefta hai

zabān-e-insāñ meñ kab hai qudrat kare jo iz.hār-e-shān-e-vahdat

na ibtidā se hai koī vāqif na us kī ma.alūm intihā hai

uThā le fazl-o-karam se yārab karīm hai aur rahīm tū hai

jo 'barq' bār-e-azīm-e-isyāñ se gir ke dar par tire paḌā hai

abas hai duri ka us ke shikwa baghal mein apne wo dil-ruba hai

chubhi hai qalib mein jis tarah jaan use tariqe se wo chhupa hai

makan bhi hai wo makin bhi hai wo wahi mila hai wahi juda hai

usi ka jalwa har ek su hai wahi hai zahir wahi chhupa hai

gham-e-mohabbat hai us ka jis ko nahin wo gham ain hai wo rahat

KHarab jo ishq mein hai us ke nahin wo bigDa bana hua hai

na parsai namaz se hai na roza-dari hai zohd-o-taqwa

mai-e-mohabbat piye jo us ki wahi haqiqat mein parsa hai

wo ranj aaKHir ko hoga rahat wo marg-e-umr-e-dawam hogi

jo ishq-e-sadiq mein mar miTa tu to phir abas shaki-e-jafa hai

na koi dushman na dost apna na nek-o-bad se hamein talluq

jo chashm-e-wahdat se hum ne dekha na kuchh bura hai na kuchh bhala hai

jo dard-e-hijran se jaan-ba-lab hai ilaj mumkin hai us ka kyunkar

masih samjhe hain jis ko wo KHud maraz mein ulfat ki mubtala hai

jahan mein sadha hazar-ha ghar base jo the wo ujaD gae hain

na hoga viran KHana-e-dil jahan wo but aa ke bas gaya hai

jo hai talabgar us ka sadiq hua hai donon-jahan se farigh

na hur-o-ghilman ka hai wo KHwahan na wo hasinon pe shefta hai

zaban-e-insan mein kab hai qudrat kare jo izhaar-e-shan-e-wahdat

na ibtida se hai koi waqif na us ki malum intiha hai

uTha le fazl-o-karam se yarab karim hai aur rahim tu hai

jo 'barq' bar-e-azim-e-isyan se gir ke dar par tere paDa hai