abas hai pesh-e-arbab-e-suKHan azm-e-suKHan mujhko

'abas hai pesh-e-arbāb-e-suḳhan azm-e-suḳhan mujh ko

vafā kahne na degī qissa-e-ranj-o-mehan mujh ko

qafas meñ mil gayā hai in dinoñ kuchh lutf hī aisā

ki bhūle se nahīñ aatī kabhī yād-e-chaman mujh ko

ḳhizāñ kī āfateñ phirtī haiñ ab tak merī nazroñ meñ

bahār-e-chañd-roza kyā dikhātā hai chaman mujh ko

but-e-tarrār se jab shikva-e-bedād kartā huuñ

sunātā hai vo zālim sar-guzasht-e-kohkan mujh ko

vo hañs kar dekh lete haiñ jo kūche se guzartā huuñ

mubārakbād 'beḳhud' merā ye dīvāna-pan mujh ko

'abas hai pesh-e-arbab-e-suKHan azm-e-suKHan mujh ko

wafa kahne na degi qissa-e-ranj-o-mehan mujh ko

qafas mein mil gaya hai in dinon kuchh lutf hi aisa

ki bhule se nahin aati kabhi yaad-e-chaman mujh ko

KHizan ki aafaten phirti hain ab tak meri nazron mein

bahaar-e-chand-roza kya dikhata hai chaman mujh ko

but-e-tarrar se jab shikwa-e-bedad karta hun

sunata hai wo zalim sar-guzasht-e-kohkan mujh ko

wo hans kar dekh lete hain jo kuche se guzarta hun

mubarakbaad 'beKHud' mera ye diwana-pan mujh ko