abas hain naseha humse za-KHud-rafton ki tadbiren

abas haiñ nāsehā ham se za-ḳhud-raftoñ kī tadbīreñ

ruke hai bahr kab go mauj se hoñ laakh zanjīreñ

hamārī aah se aage to patthar aab hote the

pa kyā jaane vo ab kīdhar ga.iiñ naale kī tāsīreñ

ye ik sūrat hai gar khīñche vo mere yaar kā naqsha

maiñ kab ma.anoñ huuñ yuuñ maanī likhe gar laakh tasvīreñ

lagā.ī aag paanī meñ ye kis ke aks ne pyāre

ki ham-dīgar chalī haiñ mauj se dariyā meñ shamshīreñ

sunā hī maiñ na gosh-e-lutf se ahvāl ko mere

chhupī thiiñ varna ḳhāmoshī meñ apnī laakh taqrīreñ

rakhe hai hosh agar tū qasr kar tūl-e-imārat kā

ki is buniyād par kab tak karegā tū ye tāmīreñ

garebāñ kī to 'qā.em' muddatoñ dhajjiyeñ uḌaa.ī haiñ

pa ḳhātir jam.a us din hove jab siine ko ham chīreñ

abas hain naseha hum se za-KHud-rafton ki tadbiren

ruke hai bahr kab go mauj se hon lakh zanjiren

hamari aah se aage to patthar aab hote the

pa kya jaane wo ab kidhar gain nale ki tasiren

ye ek surat hai gar khinche wo mere yar ka naqsha

main kab manon hun yun mani likhe gar lakh taswiren

lagai aag pani mein ye kis ke aks ne pyare

ki ham-digar chali hain mauj se dariya mein shamshiren

suna hi main na gosh-e-lutf se ahwal ko mere

chhupi thin warna KHamoshi mein apni lakh taqriren

rakhe hai hosh agar tu qasr kar tul-e-imarat ka

ki is buniyaad par kab tak karega tu ye tamiren

gareban ki to 'qaem' muddaton dhajjiyen uDai hain

pa KHatir jama us din howe jab sine ko hum chiren