abas nahin koi aansu nadamat-e-shab ka

abas nahīñ koī aañsū nadāmat-e-shab kā

ye āftāb sila hai riyāzat-e-shab kā

hamārī aañkh meñ aa.e tumhāre naam ke ḳhvāb

hameñ savāb milā hai ibādat-e-shab kā

ye āsmān pe laalī nahīñ savere kī

lahūluhān badan hai masāfat-e-shab kā

nigāh rakhnī paḌegī charāġh kī lau par

ḳhayāl rakhnā paḌegā zarūrat-e-shab kā

is imtihān meñ āñkheñ halāk hotī haiñ

halaf uThā to liyā hai hifāzat-e-shab kā

fasīl-e-chashm se bāhar nikal gayā aañsū

farār ho gayā qaidī hirāsat-e-shab kā

isī liye hai charāġhoñ pe mutma.in duniyā

use pata nahīñ shāyad tabī.at-e-shab kā

abas nahin koi aansu nadamat-e-shab ka

ye aaftab sila hai riyazat-e-shab ka

hamari aankh mein aae tumhaare nam ke KHwab

hamein sawab mila hai ibaadat-e-shab ka

ye aasman pe lali nahin sawere ki

lahuluhan badan hai masafat-e-shab ka

nigah rakhni paDegi charagh ki lau par

KHayal rakhna paDega zarurat-e-shab ka

is imtihan mein aankhen halak hoti hain

halaf uTha to liya hai hifazat-e-shab ka

fasil-e-chashm se bahar nikal gaya aansu

farar ho gaya qaidi hirasat-e-shab ka

isi liye hai charaghon pe mutmain duniya

use pata nahin shayad tabiat-e-shab ka