abhi hayat ka mahaul sazgar kahan

abhī hayāt kā māhaul sāzgār kahāñ

bhalā huzūr kahāñ aur ye ḳhāksār kahāñ

bas ek rasm-e-mulāqāt aaj baaqī hai

kisī ke dil meñ kisī ke liye bhī pyaar kahāñ

ḳhayāl-e-yār hai vaj.h-e-sukūn-e-dil lekin

ḳhayāl-e-yār kahāñ jalva-gāh-e-yār kahāñ

sunā hai yuuñ to chaman meñ bahār aa.ī hai

guloñ ke ruḳh pe magar raunaq-e-bahār kahāñ

tumhīñ ne ḳhair se muḳhtār-e-kul banāyā hai

tumhīñ batāo ki ham ko hai iḳhtiyār kahāñ

nigāh-e-mast se tū ne kabhī jo dekhā thā

vo lamhe ziist meñ milte haiñ baar baar kahāñ

na kū-e-yār chale haiñ na sū-e-dār 'hayāt'

na jaane ham bhī chale haiñ pas-e-ġhubār kahāñ

abhi hayat ka mahaul sazgar kahan

bhala huzur kahan aur ye KHaksar kahan

bas ek rasm-e-mulaqat aaj baqi hai

kisi ke dil mein kisi ke liye bhi pyar kahan

KHayal-e-yar hai wajh-e-sukun-e-dil lekin

KHayal-e-yar kahan jalwa-gah-e-yar kahan

suna hai yun to chaman mein bahaar aai hai

gulon ke ruKH pe magar raunaq-e-bahaar kahan

tumhin ne KHair se muKHtar-e-kul banaya hai

tumhin batao ki hum ko hai iKHtiyar kahan

nigah-e-mast se tu ne kabhi jo dekha tha

wo lamhe zist mein milte hain bar bar kahan

na ku-e-yar chale hain na su-e-dar 'hayat'

na jaane hum bhi chale hain pas-e-ghubar kahan